Cagdas.az xəbər verir ki, bunu “Yeni Sabah”a həkim-terapevt Şahvələd Məmmədov bildirib.
Onun sözlərinə görə, D vitamini orqanizm üçün olduqca vacib elementlərdən biridir:
“Əslində, D vitamini təkcə vitamin deyil, həm də hormon kimi fəaliyyət göstərir. Günəş şüalarının təsiri nəticəsində orqanizmdə sintez olunur və orqanizmdə müəyyən normativ göstəriciləri var. Bu göstəricilər normadan aşağı düşdükdə müxtəlif xəstəliklərin yaranmasına səbəb olur. Böyüklərdə osteoporoz, osteomalasiya kimi sümük xəstəlikləri, uşaqlarda isə raxit və raxitəbənzər hallar müşahidə oluna bilər”.
Ş.Məmmədov vurğulayıb ki, məhz buna görə də uşaqlara doğulduğu gündən etibarən, adətən, 1 yaş 6 ayına qədər həkim təyinatı ilə profilaktik olaraq D vitamini verilir:
“D vitamininin əsas funksiyalarından biri bağırsaqlarda kalsium və fosforun sorulmasını təmin etməkdir. Eyni zamanda, immun sisteminin normal fəaliyyətində də mühüm rol oynayır. Pandemiya dövründə də müşahidə olundu ki, COVID-19-u ağır keçirən xəstələrin əksəriyyətində D vitamini çatışmazlığı var idi. Belə hallarda xəstələrə analiz nəticələrinə uyğun olaraq D vitamini təyin edilir, orqanizmdə yaranmış çatışmazlıq aradan qaldırılırdı. Lakin D vitamininin həddindən artıq, yəni gündəlik və ya aylıq normadan artıq qəbul edilməsi də ciddi fəsadlara səbəb ola bilər. Buna görə bu vitamin yalnız həkim məsləhəti və təyinatı ilə qəbul edilməlidir”.
Ş.Məmmədov qeyd edib ki, pandemiya dövründə immun sisteminin zəifləməsi və virusun orqanizmə təsiri nəticəsində D vitamini çatışmazlığına daha çox rast gəlinirdi:
“Buna görə də həm uşaqlarda, həm də böyüklərdə ən çox təyin olunan preparatlardan biri də D vitamini idi. Uşaqlar və böyüklər üçün D vitamininin dozası fərqlidir. Uşaqlarda 1 yaş 6 ayına qədər profilaktik məqsədlə gündəlik qəbul tövsiyə olunur. Böyüklərdə isə doza analiz nəticələrinə əsasən müəyyən edilir və gündəlik, həftəlik və ya aylıq şəkildə təyin oluna bilər. D vitamini damcı, tablet və ampul formasında mövcuddur. Hansı preparatın və hansı dozanın uyğun olacağı isə hər bir xəstəyə fərdi qaydada həkim tərəfindən müəyyən edilir”.(
