Türkiyə Prezidenti Recep Tayyip Erdoğan “Kitaba Vəfa” sərgisində çıxış edib.
Çağdaş.Az xəbər verir ki, Prezident çıxışında mədəni irsin, kitabların və tarixi əsərlərin qorunmasının vacibliyini vurğulayıb.
Ərdoğanın çıxışından əsas məqamlar belədir:
“Keçmişi olmayanın gələcəyi də olmaz. Öz keçmişi ilə bağını qoparanın inşa edə biləcəyi bir gələcək yoxdur. Mədəniyyətimizin arxasında, bir hissəsi burada nümayiş etdirilən əsərlərdən qaynaqlanan böyük bir bilik və təcrübə toplanıb”.
Türkiyə lideri bildirib ki, sivilizasiyanı izah edərkən tez-tez çinar ağacı nümunəsi çəkilir:
“Sivilizasiyalar da ağaclar kimi kökləri ilə möhkəmlənir. Bizi öz mədəniyyətimizə bağlayan ən güclü damarlarımız isə kitablarımızdır”.
Ərdoğan qeyd edib ki, müəyyən dövrlərdə xalqın öz kökləri ilə əlaqəsini kəsmək istəyənlərin kitabları hədəf alması təsadüfi olmayıb.
“Bu ölkə ən qiymətli sənədlərinin kağız kütləsinə çevrilmək üçün tullantı toplayanlara satıldığı günləri yaşayıb. Ən böyük kitab itkiləri hərbi çevriliş dövrlərində baş verib”, – deyə o bildirib.
Prezident bəzi sahələrdə müşahidə olunan mədəni zəifləmənin səbəbləri arasında bu yanlış addımların da rol oynadığını vurğulayıb.
Ərdoğan Hisar Vəqfinin tarixi və mədəni irsi qoruyan fəaliyyətini yüksək qiymətləndirərək deyib:
“Bizi köklərimizə bağlayan əsərlərə sahib çıxılması olduqca vacibdir. Biz cild sənəti sahəsində nadir və qiymətli əsərlər yaratmış bir millətik”.
