İsveçrədə aparılan araşdırma çirkab sularına hər il xeyli miqdarda qiymətli metalın qarışdığını üzə çıxarıb.
Cagdas.az xəbər verir ki, İsveçrə Federal Su Elmləri və Texnologiyaları İnstitutunun (EAWAG) məlumatına görə, ölkədə kanalizasiya sistemi vasitəsilə hər il təxminən 43 kiloqram qızıl və 3 ton gümüş itkiyə gedir.
Mütəxəssislər hesab edirlər ki, bu qiymətli metalların ümumi dəyəri təxminən 3 milyon İsveçrə frankı (6 milyon manat) təşkil edir.
Araşdırmaya əsasən, ən yüksək qızıl konsentrasiyası Ticino kantonunda qeydə alınıb. Alimlər bunu bölgədə fəaliyyət göstərən qızıl emalı müəssisələri ilə əlaqələndirirlər.
Bundan başqa, çirkab sularında sənaye və yüksək texnologiyalarda istifadə olunan bəzi nadir metallar da aşkar edilib. Bununla belə, ekspertlər bildirirlər ki, mövcud texnologiyalar və xərclər nəzərə alındıqda bu metalların kanalizasiya sularından çıxarılması hələlik iqtisadi baxımdan məqsədəuyğun hesab edilmir.(sfera.az)
