Son dəqiqə
Bakıda güclü külək 68 ağaca ziyan vurub Qızıl-gümüş ucuzlaşdı Bu ərazilərə qar yağır AZAL Sabiha Gökçen Hava Limanına uçmayacaq – RƏSMİ Metro stansiyalara yaxın ərazilərdə evlər bahalaşdı – VİDEO Avtomobil almaq istəyənlər bu xəbəri gözləyirdi: ƏDV dəyişir, qiymətlər necə olacaq? Bakıda evləri sökülən sakinlərə ŞAD XƏBƏR: Hər kvadratmetrə 2800 manat… Taksidən istifadə edənlərə PİS XƏBƏR: bahalaşacaq? – VİDEO Yeni tikililərdə yaşayanların DİQQƏTİNƏ: İşığınız və suyunuz kəsilərsə, dərhal buraya müraciət edin! Paytaxtın xəritəsi dəyişir: Bakının bu 5 istiqamətinə axın başlayır – Binəqədi, Zığ, Hövsan və Qala…

Mətbuat Şurasının IX qurultayı keçirilir

Cəmiyyət

Bu gün Azərbaycan jurnalistlərinin IX qurultayı keçirilir. Qurultayda Azərbaycan Mətbuat Şurasının yeni rəhbərliyinin və İdarə Heyətinin formalaşdırılması istiqamətində səsvermə başlayıb.

Cagdas.az  xəbər verir ki, Rəşid Behbudov adına Mahnı Teatrında keçirilən qurultayda ölkənin müxtəlif media qurumlarının, informasiya agentliklərinin, qəzetlərin, xəbər portallarının və jurnalist təşkilatlarının nümayəndələri iştirak edirlər.

Mətbuat Şurasının əvvəlcədən açıqladığı məlumata əsasən, qurultayda iştirakını 225 nümayəndə təsdiqləyib.

Dördillik fasilədən sonra keçirilən qurultayın əsas gündəliyi Mətbuat Şurasının ötən dövrdəki fəaliyyətinin qiymətləndirilməsi, yeni İdarə Heyətinin seçilməsi, sədrin müəyyənləşdirilməsi, eləcə də qurumun fəaliyyətini tənzimləyən sənədlərə dəyişikliklərin edilməsidir.

İdarə Heyətinin tərkibi dəyişir

IX qurultayın əvvəlki qurultaydan əsas fərqlərindən biri Mətbuat Şurasının İdarə Heyətinin say tərkibi ilə bağlıdır.

Belə ki, 2022-ci ildə keçirilən VIII qurultayda İdarə Heyətinə 23 nəfər seçilmişdi. Onlardan 14-ü jurnalistləri, 9-u isə ictimaiyyəti təmsil edirdi.

Hazırkı İdarə Heyətinin 13 üzvü, o cümlədən sədr Rəşad Məcid seçkidə iştirak etməyəcək.

Belə ki, Mətbuat Şurasının indiki sədri Rəşad Məcid, sabiq sədr Əflatun Amaşov, Qulu Məhərrəmli, Vüsalə Mahirqızı, Rauf Arifoğlu, Elçin Mirzəbəyli, Aydın Quliyev, Aqil Ələsgər və digər tanınmış şəxslər adlarının seçki bülleteninə daxil edilməməsini xahiş ediblər.

Siyahıda ümumilikdə 46 nəfərin adı yer alıb. Onların 28-i media, 18-i isə ictimaiyyət nümayəndələri üzrə namizəddir.

Namizədlər arasında tanınmış media rəhbərləri, baş redaktorlar, jurnalistlər, ali təhsil müəssisələrinin nümayəndələri və ictimai xadimlər var.

Hazırda IX qurultay çərçivəsində seçki prosesi davam edir. Səsvermənin yekununda Mətbuat Şurasının yeni İdarə Heyətinin tərkibi və sədri məlum olacaq.