Prezident İlham Əliyevin Naxçıvana səfəri bir çox baxımdan diqqət çəkib və bir müddətdir ki, sosial şəbəkələrin Azərbaycan seqmentində, eləcə də həm yerli, həm də xarici mediada geniş müzakirə edilir. Xüsusi ilə son səfər çərçivəsində iqtisadiyyat, enerji, nəqliyyat, təhlükəsizlik, turizm və şəhərsalma ilə bağlı bir sıra mühüm layihələr diqqət mərkəzində oldu.
Ümumiyyətlə, Naxçıvanın Azərbaycanın bugünkü siyasi, iqtisadi və geostrateji xəritəsində əhəmiyyətinin artması heç kəsə sirr deyil. Ekspertlər isə qeyd edir ki, dəyişən regional şərtlər və yeni reallıqlar fonunda Naxçıvan ölkəmiz və bütövlükdə region üçün strateji əhəmiyyət kəsb edir.
Xüsusilə Zəngəzur dəhlizinin, yaxud TRIPP layihəsinin reallaşması Naxçıvanın regiondakı mövqeyinə ciddi təsir edəcək. Bu dəhlizin açılması Naxçıvan üçün yeni iqtisadi və nəqliyyat imkanları yarada bilər.
Ölkə rəhbərinin son müsahibəsində Naxçıvanın Şərq-Qərb və Şimal-Cənub nəqliyyat dəhlizlərinin mühüm qovşaqlarından birinə çevrilə biləcəyini vurğulaması da diqqət çəkir.
Cagdas.az -a danışan Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev deyib ki, Naxçıvanın indiki şəraitdə geostrateji əhəmiyyəti əvvəlki illərdən çox artıb:
“Uzun illərdir blokadada olan ərazi nəhayət Azərbaycan Prezidenti İlham Əliyevin səyləri və qəti mövqeyi nəticəsində blokadadan çıxır. İkinci Qarabağ müharibəsindən sonra Naxçıvanın gələcəyi və Zəngəzur dəhlizi haqda Azərbaycanın tezisləri formalaşıb. Azərbaycan prezidentin apardığı siyasət nəticəsində Zəngəzur dəhlizi TRIPP adı ilə də olsa ərsəyə gəlməkdədir. Yaxın müddətdə isə istismarının şahidi olacağıq. Beləliklə, Naxçıvan təcriddən çıxacaq, Azərbaycanın əsas hissəsi ilə bağlantı yaranacaq. Bu, bizim üçün mühüm əhəmiyyətlidir.
Zəngəzur dəhlizi ümumilikdə region üçün də çox mühümdür. Xüsusi ilə qeyd etmək olar ki, Naxçıvandan Türkiyəyə çəkilən dəmir yolu Cənubi Qafqazın Orta Dəhlizin çox vacib hissəsidir.
Azərbaycan regional layihələrdə söz sahibidir və bu çox mühümdür. Azərbaycan Qazaxıstan, Gürcüstan, Türkiyə ilə bir sıra layihələr həyata keçirir. Bakı-Tbilisi-Qars və Qazaxıstan ilə əldə edilən yeni razılaşma regionun gələcəyi üçün çox vacibdir.
Fərid Şəfiyev
Orta Dəhliz günü gündən əhəmiyyəti artır və Azərbaycan Prezidentinin ardıcıl siyasəti, atdığı addımlar burada xüsusi əhəmiyyət kəsb edir”.
Deputat Səməd Seyidov isə deyib ki, cənab Prezidentin Naxçıvana səfəri özü-özlüyündə tarixi bir səfərdir:
“Artıq Naxçıvan sadəcə Azərbaycanın gözəl diyarı, möhkəm, alınmaz qalası, mərdliyin məkanı olması ilə yanaşı, həm də dünya əhəmiyyətli bir əraziyə çevrilir. Naxçıvan Asiyanı və Avropanı, Şərqi və Qərbi, Şimalı və Cənubu özündə birləşdirən geostrateji məkandır. Bu da heç də təsadüfi deyil. Bu, cənab Prezidentin ardıcıl apardığı siyasətin nəticəsidir.
44 günlük Vətən müharibəsinin nəticəsində Azərbaycanın nəinki torpaqları işğaldan azad olundu, ölkəmiz bütövlükdə Cənubi Qafqazı yeni bir mərhələyə gətirdi. Bununla da ölkəmizin ayrılmaz hissəsi olan Naxçıvan tamamilə başqa iqtisadi-siyasi çəkiyə malik olmağa başlayıb. TRIPP yolu haqqında danışarkən deyə bilərik ki, Naxçıvanın nə qədər əhəmiyyətli olduğu bir daha görünür. Təsadüfi deyil ki, ABŞ TRIPP yoluna Prezidentin adını verərək bu layihənin region üçün əhəmiyyətini elan edib.
Səməd Seyidov
Bu gün biz tamamilə yeni layihələri həyata keçiririk. Söhbət təkcə yolların çəkilməsindən getmir. Söhbət yeni Avropa üçün enerjinin nəql olunmasından, əlaqələrin qurulmasından gedir. Bütün bunların kökündə Cənubi Qafqazda daimi və möhkəm sülhün əməli şəkildə təmin edilməsi dayanır.
Mən heç də təsadüfi demədim ki, Naxçıvan Azərbaycanın alınmaz qalasıdır. Bunu sübut edən, bayrağın hərbi hissələrə təhvil verilməsi, Naxçıvanın gücünün artırılması, ümumiyyətlə, ordumuzun möhkəmlənməsi, dediyim iqtisadi-siyasi məsələlərə əsas yaradan ən vacib faktordur.
Heç kəsə sirr deyil ki, dünya dəyişib və beynəlxalq qanun demək olar ki, işləmir. Bu gün o ölkələr ki, öz güclü ordusuna malik deyil, özünü müdafiə etmək iqtidarında deyil, xalq ilə iqtidarın birliyini təşkil edə bilmir, ordusunu saxlaya bilmir, müstəqil olmağa layiq deyil. Bu gün ordumuzun güclü olması, xüsusilə Naxçıvan ordusunun güclü olması suverenliyimizin, iqtisadi-siyasi güclü layihələrin və perspektiv məsələlərin qarantıdır”\Globalinfo.az\
