Rusiyada 2026-cı ilin sonunadək neft hasilatının cüzi azalacağı, lakin ixrac həcmlərinin sabit səviyyədə qalacağı açıqlanıb.
Çağdaş.Az xəbər verir ki, bu barədə Rusiyanın Baş nazirinin müavini Alexander Novak Şərq İqtisadi Forumu çərçivəsində jurnalistlərə bildirib.
Novakın sözlərinə görə, hazırda hasilat göstəricilərində proqnozlarla müqayisədə qismən azalma müşahidə olunur.
“Bu, əsasən neft emalı zavodlarında planlaşdırılmamış təmir işləri səbəbindən istehsal güclərinin tam istifadə olunmaması ilə bağlıdır”, – deyə o qeyd edib.
Baş nazirin müavini vurğulayıb ki, hasilatdakı eniş müvəqqətidir və emal zavodları tam fəaliyyətini bərpa etdikdən sonra neft istehsalının yenidən artacağı gözlənilir.
Novak bildirib ki, Rusiyanın neft ixracında sabitlik qorunur.
“Son illərdə, xüsusilə dəniz nəqliyyatı istiqamətində genişləndirilən ixrac infrastrukturu hazırda maksimum gücü ilə istifadə olunur”, – deyə o əlavə edib.
Qeyd edək ki, Eastern Economic Forum sentyabrın 1-4-də Rusiyanın Vladivostok şəhərində, Uzaq Şərq Federal Universitetinin kampusunda keçirilir. Forumun builki əsas mövzusu “Uzaq Şərq: İnsanların rifahı naminə inkişaf” şüarıdır. Forum Rusiya hökumətinin dəstəyi ilə Roskonqres Fondu tərəfindən təşkil olunur.
Xəqani Əzizli
