“Sabah” Azərbaycan futbolunun tarixində daha bir möhtəşəm səhifə yazdı. UEFA Çempionlar Liqasının pley-off mərhələsinin cavab oyununda Bakıda İsrail çempionu “Hapoel Beer-Şeva”nı əlavə vaxtda 5:2 hesabı ilə məğlub edən “Sabah” iki oyunun nəticəsinə görə 6:4 hesabı ilə qalib gəldi və turnirin əsas mərhələsinə vəsiqə qazandı.
Cagdas.az xəbər verir ki, ilk görüşdə “Sabah” səfərdə 1:2 hesabı ilə uduzmuşdu. Bu səbəbdən Bakıda keçirilən cavab qarşılaşmasında Azərbaycan təmsilçisinə ən azı iki top fərqli qələbə lazım idi. Qarşılaşma isə “Sabah” üçün heç də asan başlamadı. “Hapoel Beer-Şeva” 10-cu dəqiqədə İqor Zlatanoviçin qolu ilə hesabı açdı. Lakin “Sabah” geri çəkilmədi və 38-ci dəqiqədə Kristian Nvaçukvu hesabı bərabərləşdirdi.
İkinci hissədə qonaqlar Qay Mizrahinin qolu ilə yenidən önə keçsələr də, “Sabah”ın mübarizəsi bununla bitmədi. 74-cü dəqiqədə Umarali Rahmonəliyev uzaq məsafədən dəqiq zərbə ilə hesabı 2:2 etdi. Əsas vaxta əlavə olunmuş 4-cü dəqiqədə isə Tellur Mütəllimovun qolu “Sabah”ı arzuladığı əlavə vaxta daşıdı.
Əlavə vaxtda isə artıq meydanda bir komanda var idi. 101-ci dəqiqədə Orfey Mbina “Sabah”ı hesabda önə keçirdi, 115-ci dəqiqədə isə Coy-Lens Mikels son nöqtəni qoyaraq 5:2 hesabını müəyyənləşdirdi. Beləliklə, “Sabah” inanılmaz geridönüşə imza ataraq Çempionlar Liqasının əsas mərhələsinə yüksəldi.
“Sabah” dünənki qarşılaşmada qazandığı inamlı qələbə ilə diqqətləri üzərinə çəkdi. Komandanın meydandakı mübarizəsi, düzgün taktiki yanaşması və vacib məqamlarda soyuqqanlı davranması qələbənin əsas amilləri oldu.
Bu uğurun arxasında isə komandanın baş məşqçisi Valdas Dambrauskasın xüsusi rolu diqqət çəkir. Litvalı mütəxəssis komandaya gəldiyi gündən etibarən “Sabah”ın oyun üslubunda və meydandakı davranışında nəzərəçarpacaq dəyişikliklər müşahidə olunur. Dambrauskasın taktiki intizamı, oyuna müdaxilələri və futbolçulardan maksimum faydalanmaq bacarığı komandanın nəticələrinə birbaşa təsir edir.
Dambrauskasın gəlişi ilə “Sabah”da yalnız taktiki deyil, psixoloji baxımdan da dəyişiklik hiss olunur. Komanda çətin anlarda oyundan qopmur, daha intizamlı müdafiə olunur və hücumda daha inamlı görünür. Dünənki qələbə də bu dəyişimin növbəti göstəricisi oldu.
Gecənin əsas qəhrəmanlarından biri kimi məhz Valdas Dambrauskası göstərmək olar. Onun qurduğu oyun planı və futbolçuların bu plana sadiqliyi “Sabah”ın vacib qələbə qazanmasına şərait yaratdı.
“Sabah”ın qarşıdakı oyunlarda da bu performansı davam etdirib-etdirməyəcəyi maraq doğurur. Lakin bir məqam artıq aydındır: Dambrauskasın gəlişi komandanın oyununa yeni nəfəs gətirib və dünənki qələbə bu prosesin ən parlaq nəticələrindən biri kimi yadda qaldı.
Qeyd edək ki, Valdas Dambrauskasın “Sabah”ın baş məşqçisi postuna gəlişindən sonra komandanın tarixində yeni uğur səhifəsi açılıb. Litvalı mütəxəssis ilk mövsümündə “Sabah”a Azərbaycan çempionluğu və Azərbaycan Kubokunu qazandıraraq “qızıl dubl”a imza atıb.
Dambrauskasın rəhbərliyi altında “Sabah” Avropada da tarixi nəticəyə imza atıb. Komanda Çempionlar Liqasının liqa mərhələsinə yüksələrək klub tarixində yeni rekord müəyyənləşdirib.
Beləliklə, Dambrauskasın “Sabah”dakı fəaliyyəti artıq iki titul və Avropada tarixi uğur ilə yadda qalır. Onun komandaya gəlişindən sonra “Sabah” həm nəticələri, həm də oyun xarakteri ilə diqqət çəkir.\modern.az\
