ABŞ prezidenti Donald Trampın 2026-cı il Nobel Sülh Mükafatına namizədlər arasında ola biləcəyi ehtimal edilir.
Cagdas.az xəbər verir ki, bu barədə Norveç Nobel Komitəsinin katibi Kristian Berq Harpviken “Reuters”ə açıqlamasında bildirib. Onun sözlərinə görə, bu il mükafata 287 namizəd irəli sürülüb — 208 fərdi şəxs və 79 təşkilat, və ötən illə müqayisədə çoxlu yeni adlar var.
Kamboca, İsrail və Pakistan liderləri daha əvvəl Trampı mükafata namizəd göstərdiklərini açıqlamışdılar. Əgər bu doğrudursa, namizədliklər 2025-ci ilin yaz və yay aylarında təqdim olunub və buna görə də etibarlı sayılır — müraciətlərin son tarixi 31 yanvar idi. “Reuters” qeyd edir ki, bu iddiaları yoxlamaq mümkün deyil, çünki namizədlərin siyahısı məxfi saxlanılır.
Tramp özü dəfələrlə bildirib ki, Nobel Sülh Mükafatına layiqdir. O, 2025-ci ildə vəzifəyə başladıqdan sonra ən azı 8 müharibəni dayandırdığını iddia etmişdi. Bu ilin yanvarında Venesuela müxalifətinin lideri Mariya Korina Maçado Ağ Evdə keçirilən görüş zamanı simvolik olaraq öz Nobel sülh mükafatını Trampa təqdim etmişdi (mükafat təşkilatçıları isə mükafatın yalnız Maçadonun olduğunu bildirmişdilər).
Lakin mart ayında Tramp bu mövzuya marağının azaldığını bildirib.
“Mən artıq bununla maraqlanmıram»,- deyə o, mükafatı alma perspektivi barədə suala cavab verərkən qeyd edib. ABŞ prezidenti həmçinin etiraf edib ki, İranla bağlı münaqişənin onun gələcəkdə bu mükafatı alma şansına necə təsir edəcəyini bilmir.(modern.az)
