Ümumdünya Səhiyyə Təşkilatının baş direktoru Tedros Adhanom Qebreyesus Konqo Demokratik Respublikasında Ebola virusunun yayılmasının qarşısını almaq üçün sərhədlərin bağlanmasının təsirli bir yol olmadığını bildirib.
Çağdaş.Az-ın məlumatına görə, o, bu barədə Kinşasada keçirilən mətbuat konfransında bildirib.
Onun sözlərinə görə, bu cür məhdudiyyətlər virusun yayılmasını yalnız müvəqqəti olaraq yavaşlada və hakimiyyət orqanlarına bir neçə gün vaxt verə bilər: “Lakin problemi bütövlükdə həll etmir”.
ÜST rəhbəri xəstəliyə qarşı mübarizədə əsas vasitələrin sanitar tədbirlər, tibb işçilərinin operativ işi və birbaşa epidemiyanın baş verdiyi yerdə dəstək olaraq qaldığını vurğulayıb.
Daha əvvəl Uqanda hakimiyyəti Ebola virusunun yayılması riski səbəbindən Konqo Demokratik Respublikası ilə sərhədi müvəqqəti olaraq bağlamışdı. Ruanda da oxşar tədbirlər görmüş, Zambiya isə səhiyyə monitorinqini gücləndirmişdi./Report/
