“Politico” nəşri Ağ Evdəki etibarlı mənbələrə istinadən qlobal neft bazarlarına birbaşa təsir edəcək şok plan barədə məlumat yayıb.
Cagdas.az xəbər verir ki, məlumata görə, ABŞ administrasiyası Hörmüz boğazı vasitəsilə neft tankerlərinin hərəkətini təcili bərpa etmək üçün Amerika hərbi gəmilərinin müşayiəti altında gəmilərin pullu və növbəsiz keçidini nəzərdə tutan xüsusi mexanizmin tətbiqini müzakirə edir.
Nəşr yazır ki, rəsmi Vaşinqton və Tehran arasında intensiv sülh danışıqlarının davam etdiyi bir vaxtda, Ağ Ev gəmi sahiblərini və qlobal sığorta şirkətlərini Hörmüz boğazı marşrutundan yenidən təhlükəsiz şəkildə istifadə etməyə razı salmaq üçün müvafiq variantları nəzərdən keçirir. Hazırda stol üzərində olan ən diqqətçəkən təkliflərdən biri gəmilərə bir növ “VIP buraxılış” statusunun verilməsidir. Bu plana əsasən, əlavə rüsum ödəyən xarici neft tankerləri boğazdan sürətləndirilmiş rejimdə və böyük ehtimalla ABŞ Hərbi Dəniz Qüvvələrinin döyüş gəmilərinin birbaşa müşayiəti ilə təhlükəsiz keçə biləcəklər. Lakin nəşr qeyd edir ki, bu unikal layihə ilə bağlı hələlik son rəsmi qərar qəbul olunmayıb.
“Kpler” analitik şirkətinin son peyk monitorinqi məlumatlarına görə, hazırda Fars körfəzində, Hörmüz boğazının girişində suların açılmasını və təhlükəsiz keçid icazəsini gözləyən təxminən 500-ə yaxın iri yük gəmisi toplanıb. Onların arasında qlobal enerji daşımalarında kritik rol oynayan 220 nəhəng neft tankeri də var. Pentaqonun təklif etdiyi pullu və hərbi mühafizəli “VIP” keçid sisteminin bu nəhəng gəmi tıxacını aradan qaldırmaq və dünya bazarlarında neft qıtlığının qarşısını almaq üçün müvəqqəti çıxış yolu ola biləcəyi vurğulanır.(musavat.com)
