İsrail ordusu Suriyanın cənubunda yerləşən Beyt Cinn qəsəbəsinin kənd ərazisini 24 saat ərzində ikinci dəfə artilleriya atəşinə tutub. Qolan təpələrindən təxminən 10 kilometr məsafədə yerləşən bölgəyə iki mərmi atıldığı, hücum nəticəsində ölən və yaralananların olmadığı bildirilib.
Cagdas.az xəbər verir ki, İsrail qüvvələrinin Suriyanın cənubundakı hərbi fəaliyyətlərini artırması bölgədə gərginliyi yenidən gündəmə gətirib.
Məlumata görə, İsrail Müdafiə Qüvvələri (IDF) Dəməşq ətrafı vilayətinə bağlı Beyt Cinn qəsəbəsinin kənd ərazisinə iki artilleriya mərmisi atıb. İlkin məlumatlara əsasən, hücum nəticəsində insan tələfatı və xəsarət qeydə alınmayıb. Ərazidə maddi ziyanın olub-olmadığı ilə bağlı da məlumat verilməyib. Diqqət çəkən məqam isə eyni bölgənin cəmi bir gün əvvəl də İsrail qüvvələri tərəfindən hədəfə alınmasıdır. Ötən hücum zamanı əraziyə üç artilleriya mərmisinin atıldığı bildirilmişdi.
Bölgədə gərginlik yalnız artilleriya atəşləri ilə məhdudlaşmayıb. İsrail ordusuna məxsus piyada qüvvələrinin Kuneytra bölgəsində yerləşən Rasm əl-Akrəf kəndində bir sıra evlərə basqın etdiyi bildirilib. Suriyalı təhlükəsizlik mənbələri bölgədəki son hərbi fəaliyyətin əvvəlki dövrlərlə müqayisədə yüksək intensivliklə həyata keçirildiyini qeyd ediblər.
İsrail mediasında yayılan məlumatlarda isə hücumla bağlı bəzi iddialara aydınlıq gətirilib. “Times of Israel”in məlumatına görə, İsrail ordusunun həyata keçirdiyi əməliyyat Dəməşq şəhərinə qarşı hava hücumu olmayıb. Bildirilir ki, hücum yalnız Beyt Cinn kənd ərazisinə artilleriya atəşindən ibarət olub. İsrail ordusu isə bölgəyə ardıcıl şəkildə həyata keçirilən artilleriya atəşlərinin səbəbi ilə bağlı hələlik rəsmi açıqlama verməyib.
Beyt Cinnin Qolan təpələrinə yaxın yerləşməsi bölgədə baş verən hərbi fəaliyyətləri xüsusilə diqqətçəkən edir. Eyni ərazinin qısa müddət ərzində iki dəfə hədəfə alınması isə İsrail-Suriya xəttində gərginliyin artması ilə bağlı narahatlıqları gücləndirib.\referans media\
