Yeni bir araşdırmaya görə, yuxuların böyük hissəsinin görüldüyü REM yuxu mərhələsində daha çox vaxt keçirmək 83 fərqli xəstəliyə tutulma riskinin azalması ilə əlaqələndirilir. Alimlər bildirirlər ki, sağlamlıq üçün yalnız yuxunun ümumi müddəti deyil, yuxunun hansı mərhələlərində nə qədər vaxt keçirildiyi də mühüm rol oynaya bilər.
Çağdaş.Az xəbər verir ki, Pekin Universiteti və Paytaxt Tibb Universitetinin alimləri 95 mindən çox insanın yuxu məlumatlarını araşdıraraq fərqli yuxu mərhələləri ilə xəstəlik riski arasındakı əlaqəni öyrəniblər.
“PLoS Medicine” jurnalında dərc olunan araşdırmada iştirakçıların yuxu rejimi bir həftə ərzində biləyə taxılan xüsusi cihazlarla izlənilib. Daha sonra həmin şəxslər orta hesabla 8, 9 il müddətində müşahidə olunub.
Araşdırmanın nəticələrinə əsasən, REM yuxusunda daha çox vaxt keçirən insanlarda 83 xəstəliyə tutulma riskinin daha aşağı olduğu müəyyən edilib. Bu xəstəliklər arasında ürək çatışmazlığı, Parkinson xəstəliyi, dağınıq skleroz, demensiya və Alzheimer kimi ciddi sağlamlıq problemləri də yer alıb.
Alimlər həmçinin beynin fəaliyyətinin yavaşladığı və bədənin fiziki olaraq bərpa olunduğu dərin yuxu mərhələsində daha çox vaxt keçirilməsinin 7 xəstəliyin riskinin azalması ilə əlaqəli olduğunu müəyyən ediblər.
Bu xəstəliklər arasında 2-ci tip diabet, depressiya, yuxu apnesi və Parkinson xəstəliyi də göstərilib.
Araşdırmada gecə ərzində daha uzun müddət oyaq qalan insanların isə narahatlıq, depressiya və qarın ağrısı kimi bəzi sağlamlıq problemləri ilə daha çox üzləşə biləcəyi qeyd olunub.
Tədqiqatın ümumi nəticələrinə görə, gecə ərzində 6-8 saat yatan insanların daha sağlam yuxu rejiminə sahib olduğu və müxtəlif xəstəliklərə tutulma risklərinin daha aşağı olduğu müşahidə edilib.
Lakin mütəxəssislər xəbərdarlıq edirlər ki, bu nəticələr REM yuxusunun artırılmasının xəstəliklərin qarşısını birbaşa aldığı anlamına gəlmir. Bəzi xəstəliklər hələ diaqnoz qoyulmazdan əvvəl insanın yuxu rejiminə təsir göstərə bilər.
Alimlər qeyd edirlər ki, tədqiqatın müəyyən məhdudiyyətləri də mövcuddur. Belə ki, yuxu mərhələləri xəstəxanalarda istifadə olunan xüsusi yuxu testləri ilə deyil, biləyə taxılan cihazların məlumatları əsasında müəyyən edilib.
Mütəxəssislərin fikrincə, əldə olunan nəticələr göstərir ki, sağlamlıq baxımından yalnız yuxunun müddəti deyil, keyfiyyəti və quruluşu da böyük əhəmiyyət daşıyır.
