Qətər Xarici İşlər Nazirliyi Hörmüz boğazında gərginliyin artmasının qarşısını almaq məqsədilə xüsusi kommunikasiya kanalının yaradıldığını açıqlayıb.
Çağdaş.Az bildirir ki, bu barədə Qətər Xarici İşlər Nazirliyinin sözçüsü Məcid bin Məhəmməd Əl-Ənsari mətbuat konfransında məlumat verib.
Onun sözlərinə görə, yaradılan əlaqə mexanizmi son günlər yaşanan gərginliyin nəzarətdə saxlanılmasında artıq istifadə olunub.
“Bu məqsədlə xüsusi kommunikasiya kanalı yaradılıb və son günlər baş verən gərginliyin qarşısının alınmasında ondan istifadə edilib. Bu kanal artıq fəaliyyət göstərir”, – deyə Əl-Ənsari bildirib.
Diplomat kanalın necə fəaliyyət göstərdiyi və texniki xüsusiyyətləri barədə əlavə məlumat verməyib.
Qətər XİN-in sözçüsü əlavə edib ki, Doha regional tərəfdaşları ilə birlikdə İranın da iştirak edəcəyi mümkün dialoq formatı üzərində işləyir.
Əl-Ənsarinin sözlərinə görə, məqsəd region ölkələrinin, o cümlədən İranın danışıqlar masasına əyləşərək narahatlıqlarını açıq şəkildə müzakirə etməsi üçün uyğun şərait yaratmaqdır.
