ABŞ-ın Rod-Aylend ştatı üzərində uçuş həyata keçirən özəl təyyarənin pilotu uçuş zamanı təyyarənin dərhal yaxınlığında naməlum bir obyekt gördüyünü bildirərək hava hərəkətinə nəzarət xidməti (ATC) ilə əlaqə saxlayıb. Hadisə pilotla dispetçer arasında baş tutan radio danışığının səs yazısının yayılmasından sonra gündəmə gəlib.
Cagdas.az xəbər verir ki, pilotun sözlərinə görə, naməlum obyekt təyyarənin sol tərəfində, qanada olduqca yaxın məsafədə görünüb. Obyektin kiçik ölçülü, gümüşü rəngdə və silindr formasında olduğunu deyən pilot, cismin hərəkətsiz göründüyünü və ya təyyarə ilə müqayisədə eyni mövqedə qaldığını bildirib. Pilot əlavə edib ki, obyekt üzərində qanad, pərvanə, ip və ya buna bənzər hər hansı bir bağlayıcı detal müşahidə etməyib.
Radio əlaqəsi zamanı pilot bunun dron və ya hava şarı olduğunu düşünmədiyini xüsusi vurğulayıb. Obyektin ölçü və formasının tanınan uçuş aparatlarına uyğun gəlmədiyini, bu səbəbdən nə olduğunu müəyyən edə bilmədiyini deyib.
Hava hərəkətinə nəzarət xidməti pilotun bildirdiyi ərazidə digər təyyarələrdən oxşar məlumat daxil olmadığını və radar sistemlərində qeyri-adi hər hansı bir obyektin qeydə alınmadığını açıqlayıb. Dispetçerlər pilotun müşahidəsini təsdiqləyəcək əlavə məlumatın olmadığını bildiriblər. Səs yazısında nəzarətçilərdən birinin vəziyyəti yumşaltmaq məqsədilə zarafatla “Yadplanetlilərə uğurlar” dediyi də eşidilir.
Pilot bir müddət sonra naməlum cismin görmə sahəsindən itdiyini və uçuşun heç bir problem yaşanmadan davam etdiyini qeyd edib. Hadisə zamanı təyyarədə sərnişin olub-olmaması ilə bağlı rəsmi məlumat verilməyib.
Baş verən olaydan sonra ABŞ Federal Aviasiya Administrasiyası (FAA) və ya digər rəsmi qurumlar məsələ ilə bağlı açıqlama yaymayıb. Görülən obyektin təbii hadisə, yoxsa insan tərəfindən hazırlanmış bir qurğu olub-olmadığı hələlik dəqiqləşdirilməyib.
Son illər ABŞ hava məkanında pilotlar tərəfindən bildirilən “naməlum hava hadisələri” ilə bağlı məlumatların artdığı diqqətə çatdırılır. Mütəxəssislər isə bu cür müşahidələrin əksəriyyətinin sonradan hava şarı, dron və ya optik illüziya kimi səbəblərlə izah edildiyini bildirirlər.
