2026-cı ilin ilk altı ayında Azərbaycanın cari əməliyyatlar balansında 4,7 milyard dollar profisit yaranıb. Bu göstərici ÜDM-in 12,4 faizinə bərabər olub.
Cagdas.az xəbər verir ki, bunu Azərbaycan Mərkəzi Bankının (AMB) Statistika departamentinin direktoru Samir Nəsirov 2026-cı ilin ilk yarımilinin tədiyə balansına həsr olunan brifinqdə bildirib.
Onun sözlərinə görə, cari əməliyyatlar balansının profisiti ötən ilin eyni dövrü ilə müqayisədə təxminən iki dəfə artıb.
Samir Nəsirov bildirib ki, müsbət saldonun formalaşmasında əsas pay neft-qaz sektoruna məxsusdur. Bu sektorda profisit təxminən 24 faiz artaraq 9 milyard dollara çatıb. Qeyri-neft sektorunda isə 4,3 milyard dollarlıq kəsir qeydə alınıb.
İlk yarımildə kapital və maliyyə hərəkəti balansında 3 milyard dollar kəsir yaranıb. Buna xarici maliyyə aktivlərinin 3,3 milyard dollar, xarici maliyyə öhdəliklərinin isə təxminən 300 milyon dollar artması təsir edib.
AMB rəsmisinin sözlərinə görə, hesabat dövründə ehtiyat aktivlərinin reallaşmış hissəsi 1,4 milyard dollar artıb.
İlk altı ayın yekununda Azərbaycanın strateji valyuta ehtiyatları təxminən 700 milyon dollar artaraq 85,8 milyard dollara yüksəlib. İlin səkkiz ayının nəticələrinə görə isə bu göstərici artıq 90,8 milyard dollara çatıb.
Nəsirov qeyd edib ki, Azərbaycanın tədiyə balansına qlobal əmtəə, xidmət və maliyyə bazarlarında baş verən qiymət dəyişiklikləri də birbaşa təsir göstərib.\metbuat.az\
