Cagdas.az xəbər verir ki, bunu Beynəlxalq Münasibətlərin Təhlili və Multikulturalizm Mərkəzinin sədri Fərid Şəfiyev Bakıda keçirilən “Türk dünyası dialoqları: Ortaq gələcək, ortaq vizyon” adlı panel iclasında çıxışı zamanı deyib.
Onun sözlərinə görə, Azərbaycanın istər İsrail-Türkiyə münasibətlərindəki gərginliyin azaldılmasında, istərsə də İsrail parlamentində qondarma erməni soyqırımı ilə bağlı layihənin müzakirəsinin dayandırılmasında fəaliyyəti bunun bariz nümunəsidir:
“Eyni zamanda, biz vasitəçilik səyləri də göstəririk və bu səyləri davam etdirməyə hazırıq”.
F.Şəfiyev vurğulayıb ki, Azərbaycan və Türkiyənin beyin mərkəzlərinin fəaliyyəti mühüm əhəmiyyət daşıyır və bu sahədə əməkdaşlıq davam etdirilir. Dezinformasiyaya qarşı birgə mübarizə aparılmasının vacibliyini vurğulayan mərkəz rəhbərinin sözlərinə görə, Türkiyə, Azərbaycan və Mərkəzi Asiya ölkələri öz müstəqilliklərini gücləndirməyə çalışırlar.
O, Azərbaycan-Türkiyə hərbi əməkdaşlığının digər dövlətlər üçün də nümunəvi rol oynadığını bildirib.
Fərid Şəfiyev qeyd edib ki, Azərbaycan-Türkiyə birliyinə qarşı müxtəlif məsələlər üzrə mütəşəkkil şəkildə dezinformasiya kampaniyaları aparılır.
“Yaxın Şərqdə baş verən hadisələri də qeyd etmək istərdim. Məsələn, İsrail məsələsində Azərbaycan və Türkiyənin qardaşlığına qarşı mütəşəkkil şəkildə dezinformasiya aparılır”, – o bildirib.
Fərid Şəfiyev 12 il əvvəl Avropa İttifaqının Şərq Tərəfdaşlığı sammitində baş verən hadisəni də xatırladıb. O bildirib ki, həmin tədbirdə Ermənistan prezidenti Türkiyəyə qarşı ittihamlar irəli sürüb və Azərbaycan Prezidenti İlham Əliyev buna cavab verib.
F.Şəfiyev Prezident İlham Əliyevin həmin vaxt səsləndirdiyi “Türkiyə burada yoxdur, mən varam” fikrini xatırladıb.
BMTMM sədri 2015-ci ildə Türkiyə ilə Rusiya arasında yaşanan təyyarə böhranına da toxunub. O qeyd edib ki, Azərbaycan həmin dövrdə məsələnin həllinə kömək etmək məqsədilə vasitəçilik rolu oynayıb.\ölkə.az\
