Miqrasiya orqanlarına qulluğa qəbul olunmaq üçün namizədlərlə müsabiqə və müsahibənin keçirilməsi qaydalarında dəyişiklik edilib.
Bununla bağlı Dövlət Miqrasiya Xidmətinin rəisi, II dərəcəli dövlət miqrasiya xidməti müşaviri Arzu Rəhimov müvafiq qərar imzalayıb.
Qərara əsasən, artıq imtahanda Azərbaycan Respublikasının tarixi üzrə 10 sual olmayacaq.
Azərbaycan dili üzrə sualların sayı isə 10-dan 15-ə qaldırılıb.
Kompüter bilikləri üzrə 10 sualın yerinə isə dünyagörüşü üzrə 15 sual soruşulacaq.
Beləliklə, bundan sonra imtahan Azərbaycan dili üzrə 15, qanunvericilik üzrə 50, məntiq üzrə 20, dünyagörüşü üzrə 15 sualdan ibarət olacaq.
Qeyd edək ki, daha əvvəl imtahan Azərbaycan Respublikasının tarixi üzrə 10, Azərbaycan dili üzrə 10, qanunvericilik üzrə 50, məntiq üzrə 20, kompüter bilikləri üzrə isə 10 sualdan ibarət idi.
Məlumat üçün bildirək ki, müsabiqə imtahandan və söhbətdən ibarətdir. Müsabiqəyə Əsasnamənin tələblərinə cavab verən ali təhsilli şəxslər buraxılırlar.
İmtahan test üsulu ilə həyata keçirilir. İmtahanın müəyyən olunmuş qaydada keçirilməsini təmin etmək məqsədilə digər müvafiq dövlət orqanları cəlb oluna bilərlər.
İmtahan 100 sualdan ibarətdir və 3 (üç) saat müddətində fasilə verilmədən keçirilir.
Hər düzgün cavab bir balla qiymətləndirilir. Suala düzgün olmayan cavab verilməsi və ya sualın cavabsız saxlanması “0” bala bərabərdir.
İmtahanın yekunlarına görə 70 və daha artıq bal toplamış namizəd imtahanı müvəffəqiyyətlə keçmiş hesab olunur və söhbət mərhələsinə buraxılır\milli.az\
