Çinin Tokyodakı səfirliyi Yaponiyanı diplomatik nümayəndəliklərə qarşı terror təhdidlərini araşdırmağa çağırıb.
Çağdaş.Az xəbər verir ki, səfirlik bəyan edib ki, son dövrlərdə aldığı çoxsaylı təhdidlər və görülən tədbirlərin yetərsizliyi səbəbindən Yaponiya beynəlxalq hüquq üzrə öhdəliklərini tam yerinə yetirmir.
Çinin Tokiodakı Səfirliyi keçirdiyi mətbuat konfransında bildirib ki, son zamanlar çoxlu sayda təhdid mesajı alıb. Qeyd olunub ki, özünü keçmiş yapon polisi və Özünümüdafiə Qüvvələrinin üzvü kimi təqdim edən şəxslər martın 5-də səfirliyə təhdid məktubu göndərib.
Səfirliyin məlumatına görə, bu məktublar dərhal Yaponiya hüquq-mühafizə orqanlarına təqdim olunsa da, məsələ ilə bağlı yetərli tədbir görülməyib və problem hələ də həllini tapmayıb.
Açıqlamada həmçinin xatırladılıb ki, martın 24-də Yaponiya Quru Özünümüdafiə Qüvvələrində xidmət edən 23 yaşlı leytenant Murata Kodai səfirliyin divarına dırmaşaraq əlində bıçaqla əraziyə zorla daxil olub. Hadisədən sonra Çin tərəfi Yaponiya hökumətinə diplomatik etirazını bildirib.
Digər bir insidentdə isə özünü ehtiyatda olan hərbçi kimi təqdim edən şəxs martın 31-də internet vasitəsilə səfirliyə uzaqdan idarə olunan bomba yerləşdirildiyini iddia edən təhdid mesajı göndərib.
Səfirlik bu hadisələrin beynəlxalq hüququ ciddi şəkildə pozduğunu, Çinin suverenliyi və nüfuzuna zərər vurduğunu, eləcə də diplomatik nümayəndəliklərin və əməkdaşların təhlükəsizliyinə ciddi təhdid yaratdığını vurğulayıb.
Bəyanatda Diplomatik Əlaqələr haqqında Vyana Konvensiyasına istinad edilərək qeyd olunub ki, diplomatik missiyalar toxunulmazdır və ev sahibi ölkə onları icazəsiz giriş, zərər, asayişin pozulması və nüfuzun zədələnməsi kimi hallardan qorumağa borcludur. Bununla belə, Yaponiya bu öhdəlikləri effektiv şəkildə yerinə yetirməməkdə ittiham olunub.
Səfirlik bildirib ki, son hadisələrlə bağlı Yaponiya polisi ilə təxminən 30 dəfə əlaqə saxlanılsa da, araşdırmalarda ciddi irəliləyiş əldə olunmayıb.
Rəsmi Pekin Tokiodan araşdırmaları sürətləndirməyi, məsul şəxsləri məsuliyyətə cəlb etməyi, məsələ ilə bağlı aydın mövqe ortaya qoymağı və oxşar halların təkrarlanmaması üçün konkret tədbirlər görməyi tələb edib.
