İtaliya mətbuatında yer alan xəbərlərə görə, Fiat yeni model üçün adla bağlı müraciət edib. Markanın Mərakeşdəki zavodunda istehsal olunması gözlənilən yeni modelin “Koala” adını daşıyacağı bildirilir.
Çağdaş.Az xəbər verir ki, Stellantis konserninə daxil olan İtaliyanın avtomobil nəhəngi Fiat heyvan adlarından ibarət model ailəsini genişləndirməyə hazırlaşır. Şirkətin 2026-cı ildə keçiriləcək Paris Avtomobil sərgisində təqdim etməyi planlaşdırdığı SUV modelinə Panda kimi heyvan adı veriləcəyi ehtimal olunur.
Şirkət ötən ay “Grizzly” adını da qeydiyyatdan keçirib. Sənaye mənbələrinə görə, bu adın 7 nəfərlik oturacaq tutumuna malik böyük SUV modelində istifadə ediləcəyi bildirilir.
İtaliya mətbuatının məlumatına əsasən, Fiat son olaraq Turin şəhərində “Koala” adı üçün rəsmi qeydiyyat həyata keçirib. Lakin bu adın Panda-nın daha kiçik versiyası üçün, yoxsa kupe tipli SUV modelində istifadə olunacağı hələ dəqiq deyil.
“Koala” modelinin “Fiat Grande Panda” ilə eyni platformanı paylaşacağı və ilkin istehsal hazırlıqlarının başladığı qeyd olunur. Avtomobilin əsas istehsal məkanı kimi Mərakeşdə yerləşən Kenitra zavodu göstərilir. Bununla belə, modelin seqmentindən asılı olaraq istehsal yerinin dəyişməsi ehtimalı da istisna edilmir.
Avropada markanın populyar modellərindən biri olan “Grande Panda” cari ilin ilk üç ayında 614 ədəd satış göstəricisinə çatıb.
