Qlobal bazarlarda Brent markalı neftin qiyməti yeni həftəyə yüksəlişlə başlayıb. ABŞ tərəfinin İranın son təklifini “qəbuledilməz” adlandırmasından sonra bazarlarda gərginlik yenidən artıb. ABŞ-ın “Citi group” bankı isə xəbərdarlıq edib ki, bölgədəki böhran davam edərsə, neft qiymətləri daha da yüksələ bilər.
Çağdaş.Az xəbər verir ki, hazırda Brent neftinin bir bareli 105 dolları keçib və ötən həftənin bağlanış qiyməti ilə müqayisədə təxminən 5 faiz bahalaşıb.
Məlumata görə, İran son təklifində Hörmüz boğazı bölgəsindəki blokadanın aradan qaldırılmasını, müharibə təzminatı ödənilməsini, boğaz üzərində suverenliyinin tanınmasını, yeni hücumların olmayacağına dair təminat verilməsini, sanksiyaların ləğvini və İran neftinin satışına qoyulan məhdudiyyətlərin aradan qaldırılmasını istəyib.
Regiondakı qeyri-müəyyənlik və Hörmüz boğazı ətrafında davam edən risklər neft qiymətlərində enişin qarşısını alır.
“Citi group” tərəfindən yayılan son hesabatda qeyd olunub ki, ABŞ – İran münasibətlərində gərginlik davam edərsə, neft bazarında qiymətlər daha da yüksələ bilər.
Bank bildirib ki, ehtiyatların azalması qiymətləri dəstəkləsə də, Çinin neft idxalındakı azalma və zaman-zaman gərginliyin azalacağına dair siqnallar bazardakı təzyiqi müəyyən qədər yumşaldır. Hesabata görə, Çinin aprel və may aylarında gündəlik neft idxalı 2025-ci ilin orta göstəricisi ilə müqayisədə təxminən 2,4 milyon barel azalıb.
“Citi group” əsas ssenari olaraq Hörmüz boğazındakı böhranın may ayının sonuna qədər zəifləyəcəyini proqnozlaşdırır. Bununla yanaşı, razılaşmanın əldə olunmasının çətin olması qısamüddətli riskləri artırır.
Bank üç aylıq Brent nefti proqnozunu dəyişməyərək bir barel üçün 120 dollar səviyyəsində saxlayıb. Proqnoza görə, ikinci rübdə orta qiymət 110 dollar, üçüncü rübdə 95 dollar, ilin son rübündə isə 80 dollar olacaq.
