Rusiya və Ukrayna arasında növbəti hərbi əsir mübadiləsinin həyata keçirilməsi ilə bağlı danışıqlar davam edir. Bu barədə Rusiyanın İnsan Hüquqları üzrə müvəkkili Yana Lantratova məlumat verib.
Çağdaş.Az bildirir ki, Lantratovanın sözlərinə görə, hazırda tərəflər arasında əlaqə saxlanılır və əsirlərin siyahıları üzərində iş aparılır.
O bildirib ki, təhlükəsizlik səbəbindən mübadilənin tarixi və digər təfərrüatları əvvəlcədən açıqlana bilməz.
“Mübadilə prosesi davam edir. Ümid edirəm ki, yeni mərhələ yaxın vaxtlarda baş tutacaq. Təhlükəsizlik baxımından tarixləri və digər detalları əvvəlcədən açıqlaya bilmərik. Lakin tərəflər arasında təmas var, siyahılar dəqiqləşdirilir və operativ nəticəyə ümid edirik”, – deyə Lantratova bildirib.
Xatırladaq ki, Rusiya Müdafiə Nazirliyi iyunun 26-da keçirilən son əsir mübadiləsi çərçivəsində 160 rus hərbçisinin Ukrayna əsirliyindən geri qaytarıldığını, əvəzində isə 160 ukraynalı hərbçinin Kiyevə təhvil verildiyini açıqlamışdı.
