Ermənistan xarici işlər naziri Ararat Mirzoyan ABŞ-ın sülhməramlı missiyalar üzrə xüsusi nümayəndəsinin baş müşaviri Ari Laytstounla görüşərək sülh, iqtisadi əməkdaşlıq və regional bağlantı məsələlərini müzakirə edib.
Cagdas.az xəbər verir ki, bu barədə Ermənistan Xarici İşlər Nazirliyi məlumat yayıb.
Görüşdə Transxəzər Müəssisələr Fondunun rəhbəri Konstantin Sokolov da iştirak edib.
Tərəflər 2025-ci il avqustun 8-də Vaşinqtonda keçirilən sülh sammitindən sonra əldə olunan irəliləyişləri və mühüm nəticələri qeyd ediblər. Görüş iştirakçıları Ermənistan və Azərbaycan arasında əldə olunan sülhün regionun inkişaf potensialının tam açılması üçün əhəmiyyətini vurğulayıblar.
Danışıqlarda sülhün möhkəmləndirilməsi istiqamətində mümkün addımlar, yüksək səviyyəli qarşılıqlı səfərlərin aktivləşməsi və əldə olunan razılaşmalar müzakirə olunub.
Tərəflər həmçinin Ermənistanla ABŞ arasında hərtərəfli strateji tərəfdaşlığın inkişafında əldə olunan irəliləyişlərə diqqət çəkiblər. Bildirilib ki, bu proses Vaşinqtonda bir il əvvəl imzalanmış üç memorandumun icrası nəticəsində mümkün olub.
Görüşdə süni intellekt sahəsində əməkdaşlıq və “Firebird AI” meqa-layihəsi çərçivəsində ilk mərhələ olaraq AB Factory məlumat emalı mərkəzinin yaradılması məsələləri də müzakirə edilib.
Ararat Mirzoyan və Ari Laytstoun ticarət, iqtisadiyyat, Ermənistanın enerji və iqtisadi dayanıqlığının gücləndirilməsi istiqamətində əməkdaşlıq imkanlarını da nəzərdən keçiriblər.
Tərəflər regional bağlantıların inkişafı, Ermənistanın nəqliyyat-infrastruktur sisteminə inteqrasiyası və TRIPP proqramının (Zəngəzur dəhlizi) həyata keçirilməsi məsələlərinə də toxunublar. Onlar layihənin sahədə mümkün qədər tez reallaşdırılmasında maraqlı olduqlarını bildiriblər.(modern.az)
