Azərbaycanda uzun illər fəaliyyət göstərən köhnə metodik kabinetlərin məktəblərə effektiv metodik dəstək göstərmədiyi müəyyən edildikdən sonra onların əvəzinə yeni model yaradılıb.
Cagdas.az xəbər verir ki, bunu “Ümumi təhsildə keyfiyyətin yüksəldilməsi: təcrübələr və yeni yanaşmalar” adlı elmi-praktiki beynəlxalq konfransda Azərbaycan Respublikası Təhsil İnstitutunun direktoru səlahiyyətlərini müvəqqəti icra edən, Elm və Təhsil Nazirinin müşaviri Elnur Əliyev deyib.
Onun sözlərinə görə, araşdırma göstərib ki, illərlə təhsil şöbələrinin tabeliyində fəaliyyət göstərən metodik kabinetlər məktəblərə real metodik dəstək verməkdə çətinlik çəkib. Kabinetlərdə orta hesabla 5 nəfər çalışsa da, onların bir hissəsi müəllimlərlə işləməyə hazır olmayıb.
E.Əliyev söyləyib ki, məktəblərdə ictimai əsaslarla fəaliyyət göstərən fənn metodik birləşmə rəhbərləri isə bu işi ödənişsiz, əsasən direktorların xahişi ilə könüllü şəkildə icra ediblər. Bu səbəbdən köhnə modelin effektiv olmadığı vurğulanıb.
Qeyd edib ki, mövcud vəziyyətin qənaətbəxş olmadığı müəyyən edildikdən sonra yeni struktur formalaşdırılıb.
Vurğulayıb ki, modelin əsasını Təhsil İnstitutunun Metodik Dəstək Mərkəzi təşkil edir. Burada beynəlxalq təcrübə öyrənilir, metodik dəstəyin tətbiq mexanizmləri araşdırılır.
Nəzərə çatdırıb ki, yeni model çərçivəsində üçsəviyyəli metodik dəstək sistemi yaradılıb:
“Baş metodistlər komandası. Onlar Təhsil İnstitutunun nəzdində fəaliyyət göstərən, araşdırma və məzmun hazırlığı bacarıqlarına malik aparıcı mütəxəssislər. Regional aparıcı metodistlər. Köhnə metodik kabinetlərin əvəzinə regionlarda və Bakıda formalaşdırılıb. Məktəb səviyyəsində metodistlər. Onlar isə hazırda təxminən 400 məktəbdə müəllimlərlə birgə çalışaraq yerində metodik dəstək göstərirlər”.
E.Əliyev vurğulayıb ki, metodistlərin əsas vəzifəsi məktəblərdə qarşılıqlı öyrənmə mühitinin qurulması və müəllimlərin peşəkar inkişafına dəstək verməkdir:
“Yeni modeldə metodistlərin seçimi sərt meyarlarla aparılıb. Bu vəzifəyə yalnız Sertifikatlaşdırma İmtahanında 50 və daha yuxarı bal toplayan təcrübəli müəllimlər müraciət edə biliblər. Ümumilikdə 5000-dən çox müraciət arasından yalnız təxminən 350 nəfər seçilib”.
Seçilmiş metodistlər 108 saatlıq ilkin təlim keçiblər. Aylıq toplantı və seminarlarla davamlı inkişaf imkanları əldə edirlə. Həmçinin bildirib ki, onlar əlavə vəzifə maaşı ilə təmin olunublar:
“Yeni modelin əsas hədəfi şagirdlərin öyrənmə keyfiyyətini yüksəltmək, müəllimə peşəkar və dayanıqlı dəstək göstərməkdir. Təhsil İnstitutu bildirir ki, sistemli metodik dəstək müasir məktəbin əsas istiqamətlərindən biri kimi davam etdiriləcək”.(Milli.Az)
