Dövlət müəssisələrinin operativ satınalmalar həyata keçirməsi üçün müəyyən məbləğ həddinin müəyyənləşdirilməsi təklif olunur.
Cagdas.az xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin üzvü Əlibala Məhərrəmzadə “Dövlət satınalmaları haqqında” Qanuna təklif edilən dəyişikliklərin müzakirəsi zamanı bildirib. Əlibala Məhərrəmzadənin sözügedən komitənin üzvü olduğu Milli Məclisin rəsmi sənədlərində də göstərilir.
Deputat bildirib ki, dövlətə məxsus kommersiya müəssisələrinin hər satınalma üçün ayrıca razılıq alması onların operativ qərar verməsini çətinləşdirə və bazardakı rəqabət imkanlarına təsir göstərə bilər.
“Bəzən elə hallar olur ki, bir saat ərzində qərar verilib ödəniş edilməlidir. Əgər müəssisə hər dəfə Satınalma Agentliyinə müraciət etməli olsa, bu, prosesi qeyri-mümkün edəcək və rəqabət üstünlüyünün itirilməsinə gətirib çıxaracaq”, – deputat deyib.
Əlibala Məhərrəmzadənin fikrincə, bu səbəbdən müəssisələrin müəyyən məbləğədək satınalmalar üzrə müstəqil qərar qəbul etməsinə imkan verən hədd müəyyənləşdirilə bilər.
O qeyd edib ki, belə mexanizmdə həm operativliyin təmin olunması, həm də satınalmalara nəzarətin saxlanılması arasında balans tapılmalıdır.
Deputat SOCAR-da da operativ satınalmalarla bağlı çətinliklərin yaşandığını bildirib. Onun sözlərinə görə, zəruri mal və materialların vaxtında alınması və sürətli qərarların verilməsi baxımından müəyyən məbləğədək müstəqil qərarvermə imkanının olması əhəmiyyətlidir.
Əlibala Məhərrəmzadə məsələnin geniş təhlilə ehtiyac olduğunu vurğulayaraq, bu sahədə tələsik qərarların gələcəkdə problemlər yarada biləcəyini qeyd edib.\modern.az\
