Azərbaycan Xalq Cəbhəsi Partiyasının (AXCP) sədri Əli Kərimlinin Dövlət Təhlükəsizlik Xidməti tərəfindən həbs olunaraq istintaqa cəlb edilməsi son günlər sosial şəbəkələrdə geniş müzakirə olunur.
Cagdas.az xəbər verir ki, Haqq və Ədalət Partiyasının (HƏP) sədri Əli İnsanov hadisəyə münasibət bildirib.
Əli İnsanov qeyd edib ki, Əli Kərimlinin həbsinin Ramiz Mehdiyevin istintaqa verdiyi ifadələr nəticəsində həyata keçirilməsi heç bir şübhə doğurmur:
“Bu, artıq dedi-qodu deyil. Xatırlatmaq lazımdır ki, illər əvvəl Əli Kərimlinin əməkdaşlıq etmək istəyi ilə bağlı Rusiya rəhbərliyinə yazdığı məktub barədə məlumatlar dəfələrlə mətbuatda yer almışdı”.
Onun sözlərinə görə, son illərdə Dövlət Təhlükəsizlik Xidmətinin istər ölkə daxilində, istərsə də xaricində Azərbaycan dövlətçiliyinə qarşı planlaşdırılmış ağır cinayətləri peşəkarlıqla aşkarlaması və qabaqlayıcı tədbirlər görməsi cəmiyyət tərəfindən yüksək qiymətləndirilir. Əli İnsanov DTX-nın inandırıcı dəlillər əsasında dövlət çevrilişi və dövlətə xəyanət kimi ağır ittihamlarla Ramiz Mehdiyevin həbs edilməsini “təşkilatın növbəti böyük uğuru” adlandırıb.
HƏP sədrinin fikrincə, uzun illər yüksək vəzifələrdə təmsil olunan Ramiz Mehdiyev öz səlahiyyətlərindən istifadə edərək təkcə yüksək vəzifəli şəxsləri deyil, siyasi partiya rəhbərlərini və deputatları da təsiri altına sala bilib, onları gizli şəkildə cinayət xarakterli fəaliyyətlərə cəlb edib:
“İndiyə qədər aparılan istintaq nəticəsində Ramiz Mehdiyevlə Əli Kərimlinin çirkin əməkdaşlığı barədə məhkəməyə təqdim etmək üçün kifayət qədər dəlil mövcuddur. Bu dəlillər məhkəmədə təsdiqini taparsa, xəyanət yükünü yalnız Əli Kərimli deyil, onun rəhbərlik etdiyi AXCP də daşımış olacaq”.
Əli İnsanov əlavə edib ki, istintaq zamanı ələ keçirilən sənədlər və dəlillər Ramiz Mehdiyevlə Əli Kərimlinin törədilən cinayətlərdə əlbir olmalarına şübhə yeri qoymur:
“Ölkəmizi əsrlərlə işğal edib, sərvətlərini talamış, zaman-zaman soyqırımlar törətmiş bir dövlətin vassalına çevrilmə planı bu cütlüyün vətəndaş hüquqlarından məhrum edilməsinə tam əsas verir”.
HƏP sədri Ramiz Mehdiyevi və onunla birgə fəaliyyət göstərənləri “Azərbaycan dövlətçiliyinə və milli maraqlara qarşı xəyanət”də ittiham edərək lənətlədiyini bildirib. O, həmçinin qeyd edib ki, hazırda bütün dünyanın diqqəti Azərbaycandadır və dövlətə qarşı həm xarici, həm də daxili təhlükələrin mövcud olduğu bir dönəmdə xalqın Prezident İlham Əliyevin ətrafında sıx birləşməsi vacibdir./Referans media/
