Cagdas.az Reuters agentliyinə istinadən xəbər verir ki, Avstriyanın daxili işlər naziri Gerhard Karnerin iştirak etdiyi rəsmi açılış mərasimi iyulun 22-də baş tutub.
Avstriya hakimiyyəti ilə evin sahibi arasında illərlə davam edən məhkəmə çəkişməsi 2016-cı ildə binanın müsadirə edilməsi ilə nəticələnib. Bina dövlət tərəfindən alındıqdan sonra Hitlerin doğulduğu evin sökülməsi planlaşdırılsa da, sonradan bu fikirdən imtina edilib və binanın polis bölməsinə çevrilməsi qərara alınıb.
2020-ci ildə binanın yenidən qurulmasına və polis bölməsinə çevrilməsinə beş milyon avro vəsait xərclənib.
Reuters qeyd edib ki, binada Hitlerin anadan olduğunu xatırladan yeganə əlamət Mauthauzen həbs düşərgəsindən gətirilmiş və evin yaxınlığında yerləşdirilmiş, üzərində “Faşizm – heç vaxt” sözləri həkk olunmuş xatirə daşıdır.
Adolf Hitler 1889-cu ildə Zaltsburq yaxınlığındakı Braunau-am-Inn şəhərində yerləşən bu evdə anadan olub. İllər ərzində binada məktəb, kitabxana və əlilliyi olan insanlar üçün sığınacaq fəaliyyət göstərib.(ölkə.az)
