Oracle Korporasiyası bir gündə 30 min İT mütəxəssisini işdən çıxarıb və onları neyron şəbəkələri ilə əvəz edib. Bu hadisə insan əməyinin süni intellektlə (Aİ) əvəz olunması ətrafında müzakirələrin başlamasına səbəb olub. Maraqlı məqam odur ki, son illərdə insanların bir qismi yüksək qazanc və karyera imkanları səbəbi ilə İT sahəsinə yönəlirdi.
Hazırda əsas narahatlıqlardan biri süni intellektin bir çox peşələri əvəz etməsi nəticəsində işsizliyin artması ehtimalıdır.
Belə ssenari mümkündürmü? Süni intellekt işsizliyə səbəb olacaqmı?
Çağdaş.Az xəbər verir ki, Globalinfo.az-a danışan informasiya texnologiyaları üzrə mütəxəssis Elvin Həsənov deyib ki, süni intellekt bir peşəni bütöv şəkildə yox etmir, onun daxilindəki bəzi işləri avtomatlaşdırır:
“Məsələn, İT sahəsində əvvəllər saatlarla görülən bəzi texniki işlər, kodun müəyyən hissələrinin yazılması, testlərin aparılması, məlumatların analizi artıq Aİ ilə daha sürətli edilir. Bu isə o deməkdir ki, bəzi rollar azalır, amma eyni zamanda daha kompleks və dəyərli rollara ehtiyac artır. Süni intellektin əsas rolu insanı əvəz etmək yox, onun işini optimallaşdırmaqdır. Əgər bir şirkət yalnız ixtisar yolu ilə Aİ tətbiq edirsə, bu, qısamüddətli yanaşmadır. Uzun müddətdə isə daha dəyərli olan təcrübəli insanı saxlamaq və onu yeni alətlərlə daha effektiv hala gətirməkdir. Artıq bəzi ölkələrdə bu prosesi tənzimləməyə çalışırlar. Hökumət olaraq yanaşmaya əsasən, süni intellekt tətbiq olunsun, amma sırf Aİ var deyə insanları işdən çıxarmaq düzgün sayılmır. Əksinə, şirkətlərdən gözlənilir ki, mövcud işçiləri qoruyub saxlasınlar və onları yeni texnologiyalara uyğunlaşdırsınlar. Yəni fokus ixtisarda yox, yenidən ixtisaslaşdırmadadır”.
Ekspert bildirib ki, Oracle kimi böyük şirkətlərdə ixtisarlar olur və bu təkcə Aİ ilə bağlı deyil:
“Burada xərclərin optimallaşdırılması, struktur dəyişiklikləri və bazar strategiyası da rol oynayır. Aİ sadəcə bu dəyişiklikləri sürətləndirən vasitələrdən biridir. Nəzərə alaq ki, bir çox iri qlobal şirkətlərdə Aİ ilə yazılan kodlardan istifadə qadağan edilir”.
