ABŞ Prezidenti Donald Tramp İran nümayəndələrinə etibar etmədiyini bəyan edib.
Çağdaş.Az xəbər verir ki, Tramp bu açıqlamanı Vaşinqton yaxınlığındakı Endryus Hərbi Hava Bazasındakı jurnalistlərin suallarını cavablandırarkən səsləndirib.
“Mən İrana etibar etmirəm. İrana etibar edəcək sonuncu insan mənəm”, – deyə ABŞ prezidenti bildirib.
Bununla yanaşı, Tramp vurğulayıb ki, Vaşinqton İran məsələsində “çox əlverişli mövqedədir”.
ABŞ və İsrail fevralın 28-də İrana qarşı hərbi əməliyyatlara başlayıb. İyun ayında Vaşinqton və Tehran bütün cəbhələrdə, o cümlədən Livanda dərhal atəşkəsin təmin edilməsini nəzərdə tutan anlaşma memorandumu imzalayıblar.
Lakin iyulun 8-də ABŞ Hörmüz boğazı ilə bağlı əvvəlki razılaşmaların İran tərəfindən pozulduğunu iddia edərək ölkəyə qarşı genişmiqyaslı hava zərbələrini yenidən bərpa edib.
Avqustun 2-də Tramp Tehranla razılığa gəlmək məqsədilə İrana qarşı planlaşdırılan irimiqyaslı hücumu ləğv etdiyini açıqlamışdı. Onun sözlərinə görə, İran və Yaxın Şərq ölkələri Vaşinqtondan hücumdan imtina etməyi xahiş edib, çünki tərəflər gələcək razılaşmanın ümumi konturlarını müəyyənləşdiriblər.
Al Arabiya telekanalı isə avqustun 6-da yüksəkvəzifəli mənbəyə istinadən ABŞ və İran arasında vasitəçilərin iştirakı ilə aparılan danışıqların yekun mərhələyə çatdığını bildirib.
