ABŞ Prezidentinin xüsusi nümayəndəsi Stiv Uitkoff Rusiyada məhkum olunaraq humanitar əsaslarla azadlığa buraxılan ABŞ vətəndaşı Robert Gilmanla ABŞ-da görüşdüyünü açıqlayıb.
Çağdaş.Az xəbər verir ki, Uitkoff bu barədə “X” sosial şəbəkəsində paylaşım edib.
“Bu axşam dörd ildən çox Rusiyada saxlanıldıqdan sonra Robert Gilmanı ABŞ-da qarşılamaq şərəfinə nail oldum. O, nəhayət ailəsinin yanına qayıda və ehtiyac duyduğu tibbi yardımı ala biləcək”, – deyə Uitkoff bildirib.
ABŞ prezidentinin xüsusi nümayəndəsi həmçinin Rusiya Prezidenti Vladimir Putinə humanitar əsaslarla əfv fərmanı imzaladığına və bu prosesdə şəxsi iştirakına görə təşəkkür edib.
Avqustun 11-də ABŞ Prezidenti Donald Tramp Rusiyada məhkum olunmuş amerikalı Robert Gilmanın azad edildiyini və vətənə qayıtdığını açıqlamışdı. Trampın sözlərinə görə, Putin Gilmanın heç bir məhbus mübadiləsi aparılmadan, sırf humanitar səbəblərlə azad olunmasına razılıq verib.
Reuters agentliyinin məlumatına görə, Gilman 2022-ci ildə Rusiyanın Voronej şəhərində dəmiryolu vağzalında sərxoş vəziyyətdə insident törətdikdən sonra saxlanılmışdı. O, xüsusi reyslə ABŞ-a gətirilib.
Associated Press isə Robert Gilmanın tibbi müayinə və müalicə üçün Texas ştatındakı xəstəxanalardan birinə yerləşdiriləcəyini bildirib.
