BƏƏ-nin “FlyDubai” aviaşirkətinə məxsus sərnişin təyyarəsində ikinci pilotun kapitana bıçaqla hücum edərək təyyarəni qəzaya uğratmağa cəhd etməsindən bir gün sonra hadisənin motivi və şübhəlinin kimliyi ilə bağlı araşdırmalar davam edir.
Çağdaş.Az xəbər verir ki, İsrailin Baş naziri Benjamin Netanyahuın sözlərinə görə, Dubaydan Tel Avivə uçan təyyarə İsrail hava məkanına yaxınlaşarkən ikinci pilot kapitana bıçaqla hücum edib və təyyarəni qəzaya uğratmağa cəhd göstərib.
Məlumata görə, kapitan hücuma baxmayaraq kokpitin qapısını açmağa nail olub. Bundan sonra sərnişinlər və ekipaj üzvləri ikinci pilotu zərərsizləşdiriblər. Təyyarədə olan, həmin vaxt növbədə olmayan iki pilot idarəetməni ələ alaraq təyyarəni Səudiyyə Ərəbistanının Tabuk şəhərində təcili endiriblər.
Təyyarədə ümumilikdə 174 nəfər olub. Sərnişinlər arasında ağır xəsarət alan olmayıb. Kapitan bıçaq xəsarətləri alıb, iki ekipaj üzvü isə xəstəxanaya yerləşdirilib.
Hadisəni törətməkdə şübhəli bilinən ikinci pilotun şəxsiyyəti hələlik rəsmi şəkildə açıqlanmayıb.
Oman rəsmilərindən biri onun Omanda doğulduğunu və hazırda Oman vətəndaşı olduğunu təsdiqləsə də, ölkə hökuməti bu məlumatı rəsmi şəkildə təsdiqləməyib.
İkinci pilotun hücumu hansı səbəbdən törətdiyi hələ müəyyən edilməyib.
Netanyahu bildirib ki, ilkin məlumatlara əsasən, hadisə intihar cəhdinə bənzəyir. Onun sözlərinə görə, şahidlər ikinci pilotun təyyarəni sabitləşdirmək əvəzinə idarəetmə sistemlərinə müdaxilə etməyə çalışdığını deyiblər.
Baş nazir həmçinin bildirib ki, saxlanıldıqdan sonra ikinci pilot ətrafdakılardan onu öldürmələrini istəyib.
Netanyahu bildirib ki, istintaq zamanı əldə olunan məlumatlar ikinci pilotun islamçı radikal ideologiyanın təsiri altına düşmüş ola biləcəyini göstərir. Bununla belə, o, əlavə detal açıqlamayıb.
İsrailin müdafiə naziri Israel Katz isə hadisəni “cihadçı terror aktına cəhd” kimi qiymətləndirib.
ABŞ Prezidenti Donald Tramp da hadisə ilə bağlı açıqlamasında ikinci pilotun İranla əlaqəsinin ola biləcəyini ehtimal etdiyini bildirib. Lakin Netanyahu bununla bağlı danışmaq üçün hələ tez olduğunu vurğulayıb.
İsrail təhlükəsizlik orqanları hadisənin 11 sentyabr terror aktlarına bənzər hücum cəhdi olub-olmadığını, həmçinin şübhəlinin təkbaşına hərəkət edib-etmədiyini araşdırır.
İnsidentdən dərhal sonra saxlanılan ikinci pilot əvvəlcə Səudiyyə Ərəbistanı hüquq-mühafizə orqanları tərəfindən dindirilib.
Daha sonra Səudiyyə Ərəbistanı rəsmiləri onun istintaqın davam etdirilməsi üçün Birləşmiş Ərəb Əmirliklərinə təhvil verildiyini təsdiqləyiblər.
İsrail tərəfi də hadisənin bütün təfərrüatlarını araşdırmaq üçün istintaqda iştirak edəcəyini açıqlayıb.
