Hörmüz boğazında hərbi əməliyyatların yaxın vaxtlarda başa çatacağı gözlənilmir. Bunu Rusiya Prezidentinin müşaviri Anton Kobyakov açıqlayıb.
Çağdaş.Az-ın məlumatına görə, Kobyakov bu barədə Rusiya Enerji Həftəsi çərçivəsində keçirilən mətbuat konfransında danışıb.
O bildirib ki, Hörmüz boğazı uğrunda mübarizə davam edir və bu marşrut vasitəsilə daşınan neftin həcmi müharibədən əvvəlki dövrlə müqayisədə kəskin azalıb.
Kobyakovun sözlərinə görə, müharibədən əvvəl boğazdan gündəlik təxminən 20 milyon barel neft keçirdisə, hazırda bu göstərici 1,5–2 dəfə aşağıdır. Bəzi qiymətləndirmələrə əsasən, gündəlik daşınma həcmi 10–13 milyon barel təşkil edir.
Rusiya rəsmisi qeyd edib ki, mövcud vəziyyət Hörmüz boğazında qarşıdurmanın nə vaxt başa çatacağı ilə bağlı dəqiq fikir söyləməyə imkan vermir.
