Saxta dərmanların hazırlanması və satışı ilə bağlı iş üzrə axtarılan Hindistan vətəndaşı Praşant Racan Babu Azərbaycandan ölkəsinə qayıtdıqdan sonra saxlanılıb.
Cagdas.az Hindistan mediasına istinadən xəbər verir ki, 35 yaşlı şəxs sentyabrın 28-də səhər saatlarında Benqalurudakı Kempegovda beynəlxalq hava limanında polis tərəfindən tutulub. Hindistanın xüsusi istintaq qrupu onu ştatlararası saxta dərman şəbəkəsinin əsas fiqurlarından biri hesab edir.
İstintaq zamanı şübhəlinin Azərbaycanda olduğu müəyyənləşdirilmişdi. Hindistan mətbuatının əvvəlki məlumatına görə, onun pasportu burada miqrasiya orqanları tərəfindən götürülmüşdü.
İş Hindistanda aparılan reyd zamanı böyük həcmdə saxta və istifadə müddəti bitmiş dərmanların aşkarlanmasından sonra başlanıb. İstintaq şəbəkənin müxtəlif yerlərdən əldə etdiyi preparatları yenidən qablaşdıraraq tanınmış istehsalçıların məhsulları kimi satışa çıxardığından şübhələnir.\modern.az\
