Avropanın bir sıra ölkələrində supermarketlərin soyuducu sistemlərinə kiberhücumlar həyata keçirildikdən sonra Böyük Britaniyada pərakəndə satış şəbəkələrinə xəbərdarlıq edilib.
Çağdaş.Az xəbər verir ki, bu barədə “The Telegraph” məlumat yayıb.
Məlumata görə, Belçika, İsveç, İrlandiya, Lüksemburq və Estoniyada onlarla supermarket hakerlərin hücumuna məruz qalıb. Bir neçə həftə əvvəl Fransada da yüzlərlə ərzaq mağazasında oxşar hadisələr qeydə alınıb.
Hakerlər soyuducu sistemlərinə məsafədən müdaxilə edərək bəzi hallarda temperaturu 80 dərəcəyədək yüksəldiblər. Bu səbəbdən böyük həcmdə ərzaq məhsulları yararsız hala düşüb.
Böyük Britaniyanın Milli Kibertəhlükəsizlik Mərkəzi mümkün hücumların qarşısını almaq məqsədilə pərakəndə satış şəbəkələri ilə əməkdaşlıq etdiyini bildirib.
Hökumət isə fövqəladə vəziyyətlərə hazırlıq çərçivəsində vətəndaşlara ən azı üç günlük ərzaq və digər zəruri ehtiyat toplamağı tövsiyə edir./Globalinfo.az/
