Avqustun 19-a keçən gecə Rusiya qoşunları pilotsuz uçuş aparatları (PUA) vasitəsilə Zaporojye şəhərinə hücum edib. Zərbələr nəticəsində bir nəfər həlak olub, daha altı nəfər yaralanıb.
Çağdaş.Az xəbər verir ki, yasayış və qeyri-yaşayış binalarına ziyan dəyib, dəymiş zərbələrin yerində yanğın baş verib. Hücumun fəsadları barədə Zaporojye Vilayət Hərbi Administrasiyasının rəhbəri İvan Fedorov məlumat verib.
Vilayət rəhbərinin sözlərinə görə, Rusiya dronları gecə saatlarında vilayət mərkəzinə zərbələr endirib. Hücum nəticəsində mülki infrastruktura ziyan dəyib və dəymiş zərbə yerlərindən birində yanğın alovlanıb.
Əvvəlcə altı nəfərin xəsarət aldığı bildirilirdi, daha sonra isə bir nəfərin həlak olduğu bəlli olub. Şəhərə hücum səhərə qədər davam edib. Sübh saatlarında Rusiyaya aid idarə olunan aviasiya bombası (KAB) Zaporojyenin rayonlarından birində fərdi evi dağıdıb.
Zərbə yerində yanğın başlayıb, partlayış dalğası və qəlpələr yaxınlıqdakı evlərə və təsərrüfat tikililərinə ziyan vurub. Dağıntılar altında insanın qalması barədə məlumat verilsə də, daha sonra İvan Fedorov bu məlumatın təsdiqini tapmadığını qeyd edib.
Zaporojye son günlər dəfələrlə Rusiyanın hücumlarına məruz qalıb. Xüsusilə, avqustun 17-də Rusiya dronu şəhərə zərbə endirmişdi. O zaman bağçılıq təsərrüfatlarından birinin ərazisində yanğın baş vermiş və nəticədə iki nəfər həlak olmuşdu.
“The Independent” nəşrinin yazdığına görə, Rusiya raketi ilə Ukraynanın mülki əhalisinə endirilən zərbələr yeni xəbər olmasa da, bu hücumlar getdikcə daha mürəkkəb xarakter alır və ilk dəfə olaraq müharibənin gedişatını Rusiyanın xeyrinə dəyişmək təhlükəsi yaradır. Nəşr vurğulayıb ki, zərbələrin əsas məqsədi Ukrayna xalqının dözümlülüyünü və ruhunu sındırmaqdır./Musavat.com/
Musavat.com
