Birləşmiş Millətlər Təşkilatının Baş katibi Antonio Quterreş bildirib ki, Hörmüz boğazı açılmalı və qlobal iqtisadiyyatın nəfəs almasına imkan verilməlidir.
Çağdaş.Az xəbər verir ki, Quterreş bu fikirləri BMT Təhlükəsizlik Şurasının “Beynəlxalq sülh və təhlükəsizliyin qorunması” gündəliyi çərçivəsində keçirilən və dəniz yollarının təhlükəsizliyinə həsr olunan iclasda səsləndirib. O qeyd edib ki, qlobal ticarətin əsas damarları sayılan dəniz marşrutları hazırda ciddi təzyiq altındadır.
Onun sözlərinə görə, geosiyasi gərginliklər dənizlərə də sirayət edib, ticarət gəmilərindən təzyiq vasitəsi kimi istifadə olunur və beynəlxalq dəniz hüququ çərçivəsində naviqasiya azadlığı pozulur.
Quterreş vurğulayıb ki, mart ayının əvvəlindən etibarən Hörmüz boğazından keçən gəmi hərəkətində yaranan problemlər qlobal enerji təhlükəsizliyinə, ərzaq təchizatına və ümumilikdə ticarətə ciddi mənfi təsir göstərib. Bu vəziyyətin COVID-19 pandemiyası və Ukrayna müharibəsindən sonra ən böyük təchizat zənciri pozuntularından biridir.
Baş katib əlavə edib ki, naviqasiya azadlığındakı məhdudiyyətlər səbəbindən 20 mindən çox dənizçi və 2 mindən artıq gəmi dənizdə ilişib qalıb. O, üzv dövlətləri Beynəlxalq Dəniz Təşkilatı tərəfindən hazırlanmış təcili təxliyə mexanizmini dəstəkləməyə çağırıb.
Quterreş tərəflərə müraciət edərək deyib: “Boğazı açın, heç bir ayrı-seçkilik və əlavə ödəniş olmadan gəmilərin keçidinə icazə verin, ticarətin bərpasına və qlobal iqtisadiyyatın yenidən nəfəs almasına şərait yaradın. BMT olaraq tərəflərin ortaq məxrəcə gəlməsi üçün dəstək verməyə hazırıq. Böhran anları seçim anlarıdır.”
