Moskvada 11-ci sinif şagirdi Denis Kaçanov diqqət və yaddaş funksiyalarına təsir göstərən eksperimental burun damcısı hazırlayıb.
Çağdaş.Az xəbər verir ki, 1158 nömrəli məktəbin tibb sinfində oxuyan Denis Kaçanov nootrop təsirə malik fonturasetam maddəsinin burun vasitəsilə orqanizmə daxil edilməsi imkanını araşdırıb.
Fonturasetam adətən ağızdan qəbul edilir. Maddənin suda zəif həll olması əsas çətinliklərdən biri olub. Məktəbli əlavə komponentlər seçərək çöküntüsüz, şəffaf və homogen məhlul əldə etməyə nail olub.
Araşdırmanın növbəti mərhələsi N.İ.Piroqov adına universitetin K.M.Lakin adına Əczaçılıq Elmi-Təhsil İnstitutunda davam etdirilib. Burada maddənin burundan və ağızdan qəbulu zamanı təsiri müqayisə olunub.
Təcrübədə yüksək dozada hər iki üsulun nəticələrinin müqayisəolunan olduğu, daha aşağı dozada isə burundan yeridilən maddənin təsirinin qorunduğu bildirilib. Burundan tətbiq zamanı təcrübə obyektlərində hərəkət aktivliyinin eyni dozanın ağızdan qəbuluna nisbətən daha yüksək olduğu müşahidə edilib./Musavat.com/
